يابوي هذا العرس مابـه غصيبـه

ابوي خلوني علـى كيفـي اختـار،،، يابوي هذا العرس مابـه غصيبـه


يابوي لاترمون قلبي علـى النـار،،، وتصير بكـره ياجماعـه مصيبـه


يابوي أنا اللي عارفه كل الاسـرار ،،، قلبي وانا ادري فـي دواه وطبيبـه



يابوي انا مليت من كثـر الاشـوار،،، والموت من شور القريـب لقريبـه



يُبه .. يُبه .. يامكرم الضيف والجار،،، ياسيـدي ياتـاج قلبـي حبيـبـه



لو شفت دمعي تالي الليـل مـدرار،،، النوم حاربنـي وانـا لـه حريبـه


في خاطري هم .. وهواجيس وافكار،،، ماجابت الورقا من النـوح اجيبـه


الله يعين الـي مـن الهـم محتـار ،،، أعيش فـي دنيـاي مثـل الغريبـه


الحلم الاول مـات يابـوي وانهـار،،، ذبحت حلمي ليـه؟ .. والله عجيبـه!



يابوي زاد الهم ضاقت بـي الـدار،،، صارت حياتـي ياحياتـي صعيبـه


وشعاد لو في غرفتي ورد وازهـار ،،، اشوفهـا يابـوي مثلـي كئيـبـه



ياتـاج راسـي لاتحمّلـنـي أوزار،،، تكفا طلبتـك .. لاتزيـد المصيبـه